Tvö óskyld mál

Rakst á skemmtilegan smáleðjuslag milli Michael Moore og Pete Townshend á netinu í gær. Moore vildi nota lagið frábæra Won´t Be Fooled Again í myndina Fahrenheit 911. Townshend leyfði það ekki, ekki síst þar sem hann var ekkert sérstaklega á móti Írak-stríðinu og einnig af því hann taldi lagið ekki passa við myndina - ráðlagði Moore að leita frekar í smiðju Neil Young. Moore telur hins vegar aðrar skýringar vera á höfnuninni: Hann hafi verið beðinn um að gera heimildarmynd um feril The Who en ekki haft tíma til þess. Þetta hafi Townshend sárnað mikið og svona kjósi hann að hefna sín - á þann hátt sem ekki sé samboðinn einum mesta rokktónlistarmanni sögunnar.

Feimni getur verið ófyrirsjáanleg og óskiljanleg. Síðsumars 1983 fór ég í bakarí, benti á einhver sætindi í borðinu og bað um tvö stykki. Afgreiðslustúlkan sagði: "Þetta eru Berlínarbollur." Ég sagði: "Ég er einmitt að fara til Berlínar." - Við þessar óumbeðnu en saklausu upplýsingar kafroðnaði stúlkan hins vegar og hana setti hljóða.