Miðbæjarljósmyndirnar sem nú er búið að koma upp niðri á Lækjartorgi eru feikiskemmtilegar. Ekki spillir fyrir lipur og fróðlegur textinn sem fylgir þeim. Ég get illa skilgreint þá nautn sem fylgir því að komast með þessum hætti í tæri við fortíðina en sú nautn er áþreifanleg og inspírandi.

Þórir Bergsson - aka - Þorsteinn Jónsson var flottur náungi. Sveitapiltur sem gerðist kontóristi í Reykjavik og gutlaði við viðskipti í hjáverkum og skrifaði síðan haug af merkilegum smásagnasöfnum sem seldust upp á augabragði. Blandaði geði við fáa, síst listamenn og það þurfti að ganga á eftir honum til að fá hann til að birta fyrstu sögurnar og gefa út fyrstu bókina. Þið ættuð að lesa sögurnar hans, þær eru margar góðar.