Við erum búin að panta ferðina til München en eigum eftir að ganga frá hótelpöntuninni. Við ætlum að gera það í tölvunni í morgun. Eins og áður hefur komið fram var ég síðast staddur í München fyrir réttum 20 árum. Ef einhver hefði sagt mér þá að eftir 20 ár myndi ég panta hótelgistingu í þessari borg í gegnum tölvu í íbúð á Tómasarhaganum, með þessari konu sem ég var þá nýbúinn að kynnast, þá hefði mér svo sem ekki fundist það neitt ótrúlegt. Og mér hefði líkað sú framtíðarsýn ágætlega. Mér hefði líka líkað ágætlega að ég yrði þá búinn að gefa út 5 smásagnasöfn og ynni á auglýsingastofu. Mér hefði hins vegar þótt skelfilegt að heyra að ég yrði þá 107 kíló, það hefði hljómað miklu skelfilegar en það er í raunveruleikanum.