Mig dreymdi ýmislegt í morgun sem ég gat ekki fest hendur á og skilgreint þegar ég vaknaði. Þegar ég reyndi að grufla eftir draumunum kom mér bara í hug gömul en afar skýr æskuminning: þegar ég sá konur bera fram veitingar á bökkum í Félagsheimilinu á Seltjarnarnesi laust fyrir 1970. Þær báru fram pönnukökur og lögðu glös yfir opnar kókflöskurnar. Mikið þótti mér það heillandi, þ.e. að sjá glösin lögð yfir flöskurnar. Ég dáðist líka að því að þær gætu borið þetta allt án þess að missa neitt niður. Ég man ekki hvert tilefni þessarar samkomu var.