Það getur verið að þessi maður sé mikilvægasti leikmaður Þjóðverja á HM, ekki Ballack eða Lehmann. Miroslav Klose heitir hann og er sískorandi. Annars er ég að verða pínulítið bjartsýnn enda virðist undirbúningurinn hjá Þjóðverjum geysilega markviss ef marka má blaðaskrif. Auk þess gætu menn eins og Neuville, sem maður reiknaði engan veginn með, komið mjög á óvart. Á pappírnum er Þýskaland með lakara lið en England, Ítalía, Frakkland, Argentína og að ég tali nú ekki um Brasilíu, en spennandi verður að sjá hvað heimavöllurinn og þetta dæmigerða þýska turneringa-eðli gefur þeim. Ég hef á tilfinningunni að liðið muni sýna sitt allra besta, á meðan aðrir fara kannski á taugum, detta í mellurnar eða skandalísera á annan hátt; svo er bara spurning hversu langt það besta dugar liði eins og Þjóðverjum sem mannskapslega er varla betra en Svíþjóð eða Króatía.

Annars fer ég á Keflavík - KR á morgun. KR-ingar stóðu sig vel á meðan ég var úti, vonandi fara þeir ekki að tapa þegar ég mæti aftur á völlinn.

http://skjarinn.is/skjareinn/innlendir_thaettir/thattur/store126/item4901/ Ég sá Eyvind í fyrsta skipti í uppistandi. Mér fannst hann góður. Fleira ágætt lið þarna líka.

Við Erla kusum ekki sama flokkinn í dag en við kusum væntanlega nýjan meirihluta.

Ég er að reyna að ná takti við skriftir eftir ferðina en engin aðlögun var í boði í vinnunni í gær því þar er allt vitlaust að gera. Prófarkalestur, útvarpsauglýsingar og TV-voice over hafa verið helstu verkefnin.

München var ennþá fallegri og skemmtilegri en mig minnti enda nýtur maður sín líklega betur þar á góðu hótelherbergi en í þeim vistarverum sem ég lét mér duga á sínum tíma. Auk þess er skemmtilegra að vera ekki búinn að drekka frá sér peningana sína og þurfa ekki fara með lestunum án þess að borga. München er mjög falleg og vinaleg, fólkið er afslappað og ánægt með sig á jákvæðan hátt. Það endurspeglast í hlýlegu viðmóti og góðri þjónustu. Ég held að Bæjarar séu almennt í senn meiri þjóðernissinnar (þá er ég ekki að tala um rasisma eins og tröllríður Licthenberg-hverfinu í Berlín) og bjartsýnni en margir aðrir Þjóðverjar. Þetta er landbúnaðarhérað sem kemur fram í því að miðað við stærð þykir München dálítið sveitaleg.
Enski garðurinn var nánast óbreyttur frá því ég sá hann síðast og gaman sjá að hann er að mestu látinn í friði fyrir skipulagi og sölumennsku. Merkilegt að þetta flæmi fái að vera í friði fyrir gróðursetningu, auglýsingaskiltum og endalausum leiktækjum - það er einhvern veginn eins og Mið-Evrópu sé meira gamaladags og ekki eins gegnsýrð kapitalisma og t.d. Bandaríkin og Ísland.

Skemmtilegustu hverfin eru miðbærinn þar sem Marienplatz er miðpunkturinn, háskólahverfið þar sem m.a. eru Ludwigsstrasse, Shellingstrasse og Türkenstrasse, hverfið í kringum aðallestarstöðina (hæfilega vafasamt en þó merkilega hreinlegt) og svo þykir mér auðvitað vænt um gamla hverfið mitt, Sendling, sem stendur rétt fyrir utan miðbæjarsvæðið.

Ég mæli með borgarferð til München að vori eða sumri, t.d. langa helgarferð fyrir hjón. Hún gefur öðrum vinsælum borgum ekkert eftir, s.s. Kaupmannahöfn, Prag eða London. Ég ætla ekki að nefna New York, það er dálítið ankannalegt að nefna New York og München í sömu andránni.

Ég held að Frjálslyndir nái tveimur mönnum í nótt og Sjálfstæðisflokkurinn verði með 7. Samfylking fær 4, Vinstri-græn 2 og Framsókn engan.

Í háskólahverfinu í München er gata sem heitir Türkenstrasse. Þar settumst við inn á kaffihús eitt sem mér fannst ansi kunnuglegt, hvort sem það var ímyndun eða ekki. Ég spurði þjónustustúlkuna hvort þetta kaffihús hefði verið til árið 1986. Hún vissi það ekki en spurði kollega sinn sem staðfesti að svo hefði verið. "Þá hef ég að öllum líkindum setið hér fyrir 20 árum", sagði ég stúlkunni. Ég sagði henni frá því að ég hefði verið tvö misseri við háskólann, kynnst Erlu í misserisfríi og flutt heim í júlí 86. Henni þótti þetta afar heillandi.

Við fórum tvisvar í hverfið sem ég bjó í á þessum tíma og spurðumst fyrir um staði sem voru horfnir eða breyttir. Svipaðar samræður spunnust þar og viðbrögðin voru alltaf mjög góð - fólki fannst þetta heillandi.

Við tókum mikið af myndum og ég ætla að setja eitthvað af þeim á síðuna á næstunni.

Annars var það helst að frétta úr Bæjaralandi að villtur björn gengur þar laus og var forsíðuefni blaða. Var hann búinn að drepa mikið af hundum og búfénaði. Gríðarleg HM-stemning er að myndast og sölumennskan með ólíkindum, Beate Ushe er m.a. farin að selja víbratora sem bera nöfn Olivers Kahn og Michael Ballacks.